العاصفه
وج إسنينك بنهار أظلم
وضلوعي إلهم جسر إمحصن
تعبر أطفال وفختايه
وبجفهم نجمه إمحنايه
حني البيرغ .. صعد البيرغ
بكـَليبي إترف ميّة رايه
إنسوي إهلالج –رام الله-كـَوز النشابي إو نشابج
وإبدمي اكتب كل عهودي نيشان إيظل فوكـَ إترابج
تتزراكـَ نجمات إبلادي
شبجه إتصير إبأرض الوادي
واحضن كل إهمومي إبكـَلبي
إو ماملن لو يمتد دربي
آنه الشايل جرح إجروحي.. هاكم روحي.. هاكم روحي.
إو لا ملن من شيل الراية إلا اوصل صوبي إو محبوبي
خل خفكـَ الراية إيلثمنه
والضحكه إثرية اتغازلنه
بعزم الايام اتحزمنه
وإهلال أخضر ضوّه الحارة
عزم الشبان يهب ثاره..
وأعلن..... وأعلن.....
وأعلن للوادم للوادم آنه الما تنذل افكاره
وجروح إكـَليبي الما تلتم لأشهكـَ وفضح كل اسراره
وأحركـَ ليل المِحنه إبروحي
إجفوف الحنه إمن إجروحي
أفكاري بيارغ للنجمه تمحي العار وتكسر فحمه..!!
غسلني إبدمع إمن اطفالي
إو لا عار إيظل إسمه إبـّـالي
من أصرخ ما يرحم صوتي تطلع نجمه إبصيف إهلالي
تحمر النجمه إمن الواهس عِفنه الشاطي إنريد الجالي
يلغادر آنه العيب أنذل
بدروبي إتضيع إو ما تندل
هذي بلادي.. أرض أجدادي
إطلع ليدفنك وادينه
إطلع لا يشهكـَ بسنينه .. هذا الوادي
اشراع إتراب يمر بينه يحمل ثاري إو ثار اجدادي
لو وِجَن من شهكـَة روحي يبكـَه إرمادي .. نجمه إبوادي
إتضوي الكـَيعان إسمانه
تمسح دمعاته إو احزانه
وك ذاك آنه .. وك ذاك آنه
بيرغ نجمات إيرف آنه
أنحر ليل الظلمه إبكـَوه
يلخايف من شوف العلوه اوصل بالفرحه العطشانه
غمض لا تعمه ابدخانه وك ذاك آنه
خـّيال اكـَطع دربي ابومضه
ومضة سيفي إعيون الفضه ودروب الفارس ماترضه
من ردس إحضانه إودخانه
وك ذاك آنه ... وك ذاك آنه
لا تعركـَ همتي ولا تتعب
وتظل امواكـَف للمطلب
لو يتعب مجذافي إبظلمه
بجفوفي أنحر شاطي الظلمه
هانوصل شاطي الحريه وانصعّد بيرغ من روجه
لا تنشد عن جرح الماضي إو بارز بسيوف الما ترحم
وج اسنينك بنهار اظلم
وإظلوعي إلهم جسر إمحصن
تعبر أطفال إو فختايه
وبجفهم نجمه إمحنايه.....!!!
م ن ق و ل
