الام الكبرى.. الى كل ام عراقية
ومضة :
امي بنص كرمها عيون ابوي اتبات
معزبه اتنام دنية بحضن شيلتها
واذا خطار مرنه وظيف وكت العوز
تعجن ثوبها وتخبز عبايتها
...................................
القصيدة
( كَصبة هور )
امي الله يأمي بلايه عنوان
شكد حلوه الابيات التحتويها
ماتزحف وبيهن صوره واحساس
مثل امي ويقلدنها بحجيها
خبزه اتصير امي ابطكَة العوز
وغير الحمد لله ماتجيها
اعله غصن جفوفها اتنام الفراشات
ابكد ماهيه خشنه شكد نزيها
الجنه الجوه رجليها كرامات
الله اليدري شنهو الجوه اديها
ابحلك تنورها اتوزع ابتسامات
وخير من الله تضحك لليجيها
ابكد ماعدها طيبه امصاحبة العوز
ويملها وينضنك يرجع عليها
ينام بحضن شيلتها وتغطيه
ويرد ينكر فضلها ويطي بيها
وامي المارضت عش العصافير
يكعدله اعله كرسي ومايجيها
تدري الكرسي مايفزع للايتام
ويسد اذنه اعله سماعة بجيها
تعصر خلكَ اديها ابدكة الباب
واذا محتاج يطلع تطي اديها
.........................................
وامي محلفه كل صينيه بالبيت
ابوجه خطارها اتوزع ابتسامه
معزبه وعدها بس حجاية الله
كريم او واهس وعفه وكرامه
الحمامه تفزع طيور البساتين
ومن عشوشها تطير بسلامه
اعله تنور امي لو فرع بالغروب
وملح خبزتها غزر بالحمامه
الليل يجوع عدها وياكل النوم
وخلك الزهره عدها ويه اليتامه
مكسور ابضهر تربتها ضلعين
ابكد ماتسجد ابهيبه وشهامه
وامي حزام شدَت وكت الحروب
خاف ابليس ياخذني لحرامه
ابكثر ماعجنت وخبزت بالايام
عليه تسولف وخلت علامه
العراق اعكَال ابوك ويمه اوصيك
العكَال اليطيح ايذل عمامه
ــــــــــــــــــــــــــ
منقول
